ახალი ამბები | ფერმერთა პორტალი

მდინარე რიონის სარეგულაციო ჰიდროკვანძის რეაბილიტაციასიახლეები

26/01/2018

გარემოს დაცვისა და სოფლის მეურნეობის სამინისტროს შპს „საქართველოს მელიორაცია“ ქ. ფოთთან, მდინარე რიონის სარეგულაციო ჰიდროკვანძის რეაბილიტაციას იწყებს. ობიექტზე გარემოს დაცვისა და სოფლის მეურნეობის მინისტრის მოადგილე გიორგი ჩხეიძე და საქართველოს მელიორაციის გენერალური დირექტორი არჩილ ბუკია იმყოფებოდნენ. პროექტი, პირველ რიგში, ითვალისწინებს კაშხლის ათივე ფარის ამოწევას და მათ გახსნილ მდგომარეობაში დაფიქსირებას. აღდგენითი სამუშაოები ჩაუტარდება სარეგულაციო ჰიდროკვანძს, რომელიც შედგება კაშხლისა და რაბრეგულატორისგან; შეიცვლება ამორტიზებული ელექტროტექნიკა, აღდგება ფარების მექანიკური ნაწილები, გარემონტდება ნაგებობა და კეთილმოეწყობა ნაგებობის მომსახურე ოფისი და მიმდებარე ტერიტორია. პროექტის მიხედვით, ჩატარდება ყველა საჭირო სამუშაო, რათა შესაძლო წყალდიდობის შემთხვევაში ნაგებობა მზად იყოს, გაატაროს წყლის მაქსიმალური მოცულობა იმისათვის, რომ არ მოხდეს ქ. ფოთის და ხობის მუნიციპალიტეტის სოფლების და სასოფლო-სამეურნეო სავარგულებს დატბორვა. სარეგულაციო ჰიდროკვანძის რეაბილიტაციისთვის 1 367 815-მდე ლარი დაიხარჯება. ობიექტი შპს „საქართველოს მელიორაციის“ საკუთრებაში 2017 წლის 1 დეკემბერს გადავიდა. არსებული მდგომარეობის შესასწავლად კომპანიამ ჩაატარა შესაბამისი სამუშაოები. მდგომარეობის დეტალურმა შესწავლამ ცხადყო, რომ ნაგებობა სასწრაფო რეაბილიტაციას საჭიროებს. ობიექტზე, ასევე, სამეგრელო-ზემო სვანეთის გუბერნატორი, ქ. ფოთის მერი და საკრებულოს თავმჯდომარე იმყოფებოდნენ. ქ. ფოთთან, მდ. რიონის წყალგამყოფი კვანძი, რომელიც ექსპლუატაციაშია 1959 წლიდან, შედგება კაშხლისა და რაბრეგულატორისაგან. ნაგებობა ორ იარუსიანია. კაშხლის დანიშნულებაა მდ. რიონის წყალდიდობის (4000 მ3/წმ) ხარჯის გატარება ნაბადისაკენ ქ. ფოთის ჩრდილოეთით, ხოლო რაბრეგულატორის დანიშნულებაა 400 მ3/წმ ხარჯის მიწოდება არხში ქალაქ ფოთის სანაპირო ზოლის გამორეცხვისაგან დასაცავად.